Toshkentda Fuqarolik jamiyati haftaligi o’tmoqda.
Fuqarolik jamiyati haftaligi 2-6 dekabr kunlari beshta davlat, 40 ta xalqaro tashkilot vakillarini bir joyga to‘plab, dolzarb masalalarni muhokama qilish uchun 2000 dan ortiq ishtirokchini birlashtiradi.
Tadbir «Yuksalish» harakati tomonidan Oliy Majlis palatalari, Adliya vazirligi, O‘zbekiston mahallalari assotsiatsiyasi, «Rivojlanish strategiyasi» markazi, demokratik jarayonlarni tahlil qilish markazi, O‘zbekistonning notijorat nodavlat tashkilotlari milliy assotsiatsiyasi va boshqa tashkilotlar bilan hamkorlikda tashkil etilgan.
O‘zbekistonda fuqarolik jamiyati institutlarini davlat tomonidan qo‘llab-quvvatlash tizimi shaffoflik va raqobat prinsiplariga asoslangan holda takomillashtirilmoqda. Asosiy qonunning yangi tahririda fuqarolik jamiyati institutlari konstitutsiyaviy maqomga ega bo‘ldi. Ayrim qoidalar O‘zbekiston-2030 strategiyasi va 2021-2025 yillarda fuqarolik jamiyatini rivojlantirish konsepsiyasi hamda boshqa normativ-huquqiy hujjatlarda mustahkamlangan.
So‘nggi yillarda O‘zbekiston fuqarolik jamiyatini rivojlantirishda, xususan, xalqaro NNT mablag‘larini olishdagi to‘siqlarni bartaraf etishda ma’lum yutuqlarga erishdi. Notijorat nodavlat tashkilotlari soni to‘qqiz mingdan oshdi. Ularning vakillari bugungi kunda sog‘liqni saqlash, ta’lim, texnologiya, fan, tadbirkorlik, qishloq xo‘jaligi, ekologiya, sport, inson huquqlarini himoya qilish, yoshlarni, ayollarni, nogironlarni va boshqa sohalarda faoliyat yuritmoqdalar.
Shuningdek, «uchinchi sektor» uchun kadrlar tayyorlashga katta e’tibor berilmoqda. Prezidentning «2021-2025 yillarda fuqarolik jamiyatini rivojlantirish konsepsiyasini tasdiqlash to‘g‘risida»gi farmoniga muvofiq, Prezident huzuridagi Davlat boshqaruvi akademiyasida 500 ta NNT rahbari malaka oshirdi. 2025 yilga qadar yana 250 ta lider o‘z bilim va ko‘nikmalarini oshiradi.
Notijorat nodavlat tashkilotlari vakillarining tashabbuslari bizning hayotimizda muhim rol o‘ynaydi. Xususan, ular davlat dasturlari va qonunchiligini takomillashtirishni taklif etadilar, shuningdek, mintaqalar ijtimoiy-iqtisodiy rivojlanish loyihalarini amalga oshirish bo‘yicha jamoatchilik nazorini o‘rnatadilar. Biroq, hal qilinishi kerak bo‘lgan masalalar ham mavjud.
Ularni fuqarolik jamiyati haftaligida muhokama qilish imkoniyati bo‘ladi. Prezidentning «Fuqarolik jamiyatini qo‘llab-quvvatlash tizimini yanada takomillashtirish chora-tadbirlari to‘g‘risida»gi farmoniga muvofiq, haftalik har yili dekabr oyining birinchi haftasida o‘tkazilishi belgilangan.
Ushbu tadbir ochiq muloqot va istiqbolli tashabbuslarni rivojlantirish, shaffoflik va inklyuzivlik darajasini oshirish bo‘yicha keyingi qadamlarni belgilash uchun platforma vazifasini o‘taydi. Haftalik shuningdek, NNTlarni qo‘llab-quvvatlash va davlat idoralari bilan jamiyat o‘rtasidagi hamkorlikni mustahkamlash uchun yangi imkoniyatlar yaratishga qaratilgan.
Hafta davomida quyidagi xalqaro forumlar o‘tkaziladi:
Markaziy Osiyo fuqarolik jamiyati forumi;
«Ijtimoiy mas’uliyat va ijtimoiy tadbirkorlik» forumi;
Ayollar NNTlari forumi;
O‘zbekiston xayriya harakatini rivojlantirish forumi;
O‘zbekiston va Ozarbayjon NNTlari forumi;
NNTlar milliy forumi.
Ochiq muhokamalar va muloqotlar, NNT vakillari bilan parlament a’zolari va Adliya vaziri o‘rtasida uchrashuvlar, ekologlar va ekologik faollar uchun treninglar, shuningdek, «Biz – donorlar!» xayriya aktsiyasi o‘tkaziladi.
Sovrinlar taqdim etiladi:
«Fuqarolik jamiyatini rivojlantirishga qo‘shgan hissasi uchun» nishoni;
«Bizning orasimizda qahramonlar» nominatsiyasida g‘oliblar;
«Tabiat himoyachilari» nominatsiyasida faoliyat yuritganlar.
Hafta fuqarolik sektori vakillariga dolzarb mavzularni muhokama qilish, demokratik qadriyatlarni rivojlantirishga hissa qo‘shadigan yechimlar ishlab chiqish, shuningdek, O‘zbekistonda fuqarolik jamiyatining barqaror rivojlanishi uchun tajriba almashish va qadamlar belgilash uchun yaxshi imkoniyat bo‘ladi.